Azərbaycanın telekommunikasiya və poçt sahəsində tənzimləyici qurumu olan İnformasiya Kommunikasiya Texnologiyaları Agentliyinin (İKTA) mütəxəssisləri ölkədə fəaliyyət göstərən internet provayder və operatorların nümayəndələri üçün təlim keçiblər.

Məqsəd internet xidməti təchizatçıları tərəfindən İKTA-ya öz fəaliyyətləri barədə səhih statistik məlumatların verilməsinin təmin edilməsi olub. 

Qeyd edək ki, məlumatların səhihliyinin avtomatik yoxlanılması üçün İKTA əməkdaşları xüsusi proqram hazırlayıblar. Təlimdə iştirakçılara bu proqramdan istifadə qaydaları və tələb edilən statistik göstəricilər izah olunub, onların sualları cavablandırılıb.

Təlimin sonunda indiyədək internet xidməti təchizatçılarının məlumatların verilməsində qarşılaşdıqları çətinliklərin müəyyənləşdirilməsi və gələcəkdə proqramdan istifadənin effektivliyinin ölçülməsi məqsədilə onlayn sorğu təşkil olunub.

Xatırladaq ki, İnformasiya Kommunikasiya Texnologiyaları Agentliyi ölkədə informasiya-kommunikasiya texnologiyaları və rabitə (telekommunikasiya və poçt) sahələrində tənzimləmə və nəzarəti, eləcə də radiospektr idarəçiliyini həyata keçirir.
 

İnformasiya Kommunikasiya Texnologiyaları Agentliyində (İKTA) Ümummilli Lider Heydər Əliyevin anadan olmasının 102-ci ildönümünə həsr olunan tədbir keçirilib. 

İştirakçılar Ulu Öndərin xatirəsinə hörmət və ehtiramlarını birdəqiqəlik sükutla ifadə ediblər. 

Tədbirdə çıxış edən İKTA-nın İdarə heyətinin sədri Nail Mərdanov Ümummilli Liderin Azərbaycan xalqı üçün göstərdiyi əvəzsiz  xidmətlər haqqında danışıb.

Qurum rəhbəri qeyd edib ki, Ulu Öndər Azərbaycanı bir dövlət kimi zamanın ağır və sərt sınaqlarından çıxara bilib, ölkənin gələcək inkişaf strategiyasını müəyyən edib və onun həyata keçirilməsi üçün mühüm addımlar atıb.   

Nail Mərdanov bildirib ki, Heydər Əliyevin fəaliyyətində iqtisadi inkişafın təmin edilməsi və bu istiqamətdə islahatlar aparılması prioritet sahələr olub. Hələ Ulu Öndərin Azərbaycana ilk rəhbərliyi dövründə respublikanın dinamik inkişafı üçün kompleks proqramlar işlənib hazırlanıb və həyata keçirilib.

Sonra İKTA kollektivi inzibati binanın foyesində Ulu Öndərin xatirəsinə həsr olunmuş guşəni ziyarət edib.

Cari ilin yanvar-mart aylarında İnformasiya Kommunikasiya Texnologiyaları Agentliyi (İKTA) tərəfindən 42 hüquqi və fiziki şəxs tərəfindən ixrac (idxal) nəzarətinə düşən 11 626 ədəd müxtəlif markalı və modelli avadanlıqlara xüsusi icazə verilməsi ilə bağlı edilən müraciətlərə baxılıb. 

Qanunauyğun olaraq həmin müraciətlər üzrə 8 085 ədəd avadanlığın idxalı ilə bağlı xüsusi icazə sənədinin verilməsi təmin olunub.

Eyni zamanda 6 müraciət üzrə 3 504 ədəd avadanlıq üçün edilən müraciətlərdə təqdim edilən sənədlər düzgün tərtib olunmadığından düzəliş edilərək yenidən müraciət üçün metodiki yardım edilib.

Bununla yanaşı, 36 ədəd avadanlıq üzrə icazə tələb olunmaması barədə müraciətçilər məlumatlandırılıb. Həmçinin 1 ədəd avadanlıq üçün edilən müraciət qanunauyğun olaraq aidiyyəti üzrə baxılma mərhələsindədir.

Qeyd olunan dövrdə hüquqi və fiziki şəxslər tərəfindən 454 ədəd avadanlığın mülki dövriyyəsinə xüsusi icazələrin alınması, o cümlədən onlara verilmiş icazələrin ləğvi üçün 58 müraciət edilib. 353 ədəd avadanlıq üçün edilən 43 müraciətə müsbət cavab verilib. 12 müraciət üzrə 84 ədəd avadanlığın mülki dövriyyəsinə tələb olunan sənədlər düzgün təqdim edilmədiyi üçün düzəliş olunaraq yenidən müraciət olunması barədə metodiki yardım edilib.

Bununla yanaşı, 8 ədəd avadanlıq üçün xüsusi icazə verilməsi ilə bağlı edilən 3 müraciət qanunauyğun olaraq aidiyyəti üzrə baxılma mərhələsindədir. Həmçinin verilmiş icazənin ləğvi üçün edilən müraciətlər üzrə 9 avadanlığın xüsusi icazəsinin ləğv olunması təmin edilib.

Xatırladaq ki, 2024-cü ilin mart ayında İKTA tərəfindən “Radioelektron vasitələrə verilən icazələr” elektron xidməti (https://e-permission.icta.az) istifadəyə verilib. Elektron xidmətin tətbiqi müraciətlərin daha sürətli və effektiv cavablandırılmasını mümkün edib.

Həmçinin 2025-ci ilin yanvar-mart ayları ərzində “Lisenziyalar və icazələr haqqında” Azərbaycan Respublikası Qanununun 19.6.4-cü maddəsinə uyğun olaraq sürətli poçt xidmətinin göstərilməsi üçün 75 müraciət üzrə lisenziyanın alınması üçün təqdim edilən ərizəyə əlavə olunan sənədlərdə göstərilən məlumatların uyğunluğunun qiymətləndirilməsi təmin olunub.

Nəticədə 72 ünvanda sürətli poçt xidmətinin göstərilməsi üçün müraciətlərə müsbət cavab verilib. Digər 3 müraciətlə bağlı isə müsbət rəy verilməyib.

Qeyd edək ki, telekommunikasiya və poçt rabitəsi sahəsində tənzimləyici olan İKTA bu sahələrin inkişafı üçün qanunvericilik və nizamnamə çərçivəsində fəaliyyətini davam etdirəcək.

Azərbaycanın telekommunikasiya və poçt sahəsində tənzimləyici qurumu olan İnformasiya Kommunikasiya Texnologiyaları Agentliyi (İKTA) mart ayından ölkədə internet telekommunikasiya xidməti göstərən operator və provayderlər tərəfindən quraşdırılmış “Ookla” şirkətinin “Speedtest” serverlərinin performans və əməliyyat göstəricilərinin qiymətləndirilməsinə başlayıb. Hazırda mövcud olan 38 serverdə aşkarlanmış nöqsanlar operator və provayderlərə təqdim olunub. Bu çatışmazlıqların aradan qaldırılması üçün təlimlər və müzakirələr keçirilib. 

Bəzi “Speedtest” serverlərində performans və əməliyyat göstəricilərinin çatışmazlıqları aşkarlanıb, məsələn, şəbəkəyə bağlantı sürətinin, operativ yaddaş tutumunun çox aşağı olduğu, server proqram təminatının köhnə olduğu, SSL sertifikatlarının yenilənmədiyi hallar olub. 

Qeyd olunan hallar abunəçilər tərəfindən internet sürətinin ölçmələri zamanı reallığı əks etdirməyən ölçmə nəticələrinə səbəb olurdu.

Qısa müddət ərzində tənzimləyici qurumun dəstəyi və profilaktik tədbirlər vasitəsilə performans və əməliyyat göstəricilərindəki çatışmazlıqların aradan qaldırılmasına nail olunub. 

Tənzimləyici qurum tərəfindən sözügedən istiqamətdə tədbirlər davam etdirilir. Aşkar edilmiş boşluq və çatışmazlıqların aradan qaldırılması üçün operator və provayderlərlə birgə addımlar atılır. 

Qeyd edək ki, İnformasiya Kommunikasiya Texnologiyaları Agentliyi ölkədə informasiya-kommunikasiya texnologiyaları və rabitə (telekommunikasiya və poçt) sahələrində tənzimləmə və nəzarəti, eləcə də radiospektr idarəçiliyini həyata keçirir.

İnformasiya Kommunikasiya Texnologiyaları Agentliyinin (İKTA) İdarə heyəti sədrinin müavini Ceyhun Hüseynzadə Qırğızıstanın paytaxtı Bişkekdə keçirilən beynəlxalq forumda iştirak edib.

Beynəlxalq Telekommunikasiya İttifaqı (ITU) tərəfindən təşkil edilən Müstəqil Dövlətlər Birliyi (MDB) ölkələrinin Regional İnkişaf Forumunda (RDF) regionda rəqəmsal transformasiya və inkişafla bağlı trendlər, imkanlar və çağırışlar müzakirə olunub.

Ceyhun Hüseynzadə “Rəqəmsal transformasiyanı sürətləndirmək üçün əlverişli hüquqi və tənzimləyici mühitin yaradılması” panelində və “Rabitə infrastrukturu və rəqəmsal inkişafın sürətləndirilməsi məqsədilə tərəfdaşlığın genişləndirilməsinin təşviqi” mövzusunda keçirilən dəyirmi masada iştirak edib. Çıxış edən İKTA rəsmisi Azərbaycanın bu istiqamətdəki təcrübəsini paylaşıb.

C.Hüseynzadə forum çərçivəsində keçirilən “MDB regionu üzrə Beynəlxalq Telekommunikasiya İttifaqının regional təşəbbüsləri” adlı dəyirmi masada da iştirak edib. Tədbirdə yeni texnologiyaların tətbiqində innovasiyaların və tərəfdaşlığın təşviqi məqsədilə infrastrukturun inkişaf etdirilməsi məsələləri müzakirə olunub.

Tədbirdə əşyaların interneti, sənaye interneti, “ağıllı” şəhərlər və icmalar, 5-ci nəsil mobil şəbəkə (5G), gələcəyin interneti və şəbəkə texnologiyaları (NET-2030), rabitə şəbəkələri, kvant texnologiyaları, süni intellekt, rəqəmsal səhiyyə, rəqəmsal bacarıqlar və ətraf mühitin mühafizəsi kimi sahələr üzrə fikir mübadiləsi aparılıb.

İKTA rəsmisi həmçinin MDB regionu üzrə Regional Hazırlıq Toplantısında (RPM-CIS) iştirak edib.

Toplantıda 2025-ci ilin noyabrında Bakıda baş tutacaq Ümumdünya Telekommunikasiya İnkişaf Konfransına (WTDC-25) hazırlıq məsələləri, eləcə də telekommunikasiya və İKT sahəsində regional prioritetlərin müəyyənləşdirilməsi, üzv dövlətlərin və sektor üzvlərinin ehtiyaclarının qiymətləndirilməsi, həmçinin gələcək fəaliyyət planlarının müzakirəsi həyata keçirilib.

Azərbaycanın telekommunikasiya və poçt sahəsində tənzimləyici qurumu olan İnformasiya Kommunikasiya Texnologiyaları Agentliyi Yay Təcrübə Proqramı elan edir.

Proqram tənzimləmə, radiospektr idarəçiliyi, informasiya texnologiyaları, hüquq, xidmət bazarlarına nəzarət və istehlakçı hüquqları, ictimaiyyətlə əlaqələr istiqamətlərini əhatə edir.

Proqramda iştirak etmək üçün namizədlər yerli və ya xarici dövlətlərin ali təhsil müəssisələrinin 4-cü kurs bakalavriat pilləsi, yaxud 1-ci və 2-ci kurs magistratura pilləsi üzrə təhsil almalı, magistratura pilləsində təhsil alan namizədlərin bakalavr pilləsi üzrə yekun ümumi orta müvəffəqiyyət göstəricisi 75-80 baldan yuxarı olmalıdır.

Təcrübə proqramına qoşulan tələbələr nəzəri biliklərini tətbiq etmək, telekommunikasiya sahəsində praktiki bilik və bacarıqların formalaşdırılması məqsədilə keçiriləcək təlimlərə qatılmaq imkanı əldə edəcəklər.

Proqramda iştirak etmək üçün Agentliyin rəsmi veb-saytının “Karyera” bölməsi vasitəsilə cari il 19 mayadək müraciət etmək mümkündür.

Proqrama seçim 3 mərhələdən ibarət olacaq:

• Sənəd qəbulu üzrə ilkin yoxlamanın aparılması
• Müsahibə
• Namizədlərin tapşırıq əsaslı qiymətləndirilməsi

Yay təcrübə proqramı 1 iyuldan 29 avqustadək davam edəcək.

Qeyd edək ki, müraciətlər zamanı yaranan suallar hr@icta.az elektron poçt ünvanına göndərilə bilər.

Azərbaycanın telekommunikasiya və poçt sahəsində tənzimləyici qurumu olan İnformasiya Kommunikasiya Texnologiyaları Agentliyi (İKTA) abunəçilərin internet xidmətlərindən istifadəsi üzrə növbəti şikayət indeksi və şikayətlərin orta cavablandırılma müddəti hesabatını dərc edib.

Hesabatda 2025-ci ilin I rübü ərzində “E-Şikayət” sistemi vasitəsilə internet operator və provayderlərinə ünvanlanmış müraciətlərlə bağlı şikayət indeksi və indeks üzrə dinamika əksini tapıb. Belə ki, 2024-cü ilin IV rübü üzrə hesabatla cari hesabatın müqayisəsi aparılıb və operator, yaxud provayderin indeks dəyişiklik dinamikası müəyyən olunub.

Eyni zamanda hesabatda təqdim edilən şikayətlərin orta cavablandırılma müddəti məlumatı “E-Şikayət” sisteminə I rübdə daxil olan müraciətlərin telekommunikasiya operator və provayderləri tərəfindən icra müddətini əks etdirir və bazar payının 90%-dək hissəsini təşkil edən şirkətlərə daxil olmuş müraciətlər əsasında formalaşıb.

İKTA bəyan edir ki, ictimai nəzarətin formalaşması, şəffaflıq və xidmət keyfiyyətinin yüksəldilməsi baxımından şikayət indeksinin və şikayətlərin orta cavablandırılma müddəti hesabatının hazırlanması zəruri addımdır. Bu, telekommunikasiya sektorunda real mənzərəni müəyyən etməyə, tənzimlənmə prosesini daha asan və tez həyata keçirməyə imkan yaradacaq.

Məlumat üçün bildirək ki, “E-Şikayət” sistemi 2023-cü ilin noyabrında istifadəyə verilib. Bu günə qədər vətəndaşlar tərəfindən adıçəkilən sistem vasitəsilə telekommunikasiya və poçt xidmətləri ilə bağlı 6000-ə yaxın müraciət daxil olub.

2024-cü ilin martından isə artıq “Android” və “iOS” əməliyyat sisteminə malik cihazların istifadəçiləri müvafiq olaraq “Google play”dən və “APP store”dan “E-Şikayət”in mobil tətbiqini yükləmək imkanı əldə ediblər. Mobil tətbiqin istifadəyə verilməsi xidmətdən istifadənin miqyasını genişləndirməklə yanaşı, platformanı da daha əlçatan edir.

Agentlik şikayət indeksi və şikayətlərin orta cavablandırılma müddəti hesabatının dərcinin davamlı olacağını və geniş ictimaiyyətə rüblük təqdim ediləcəyini bir daha bəyan edir. İKTA gələcək fəaliyyətində bu cür ictimai iştirakçılıq vasitələrindən tənzimləmə və nəzarət mexanizmlərinin qurulmasında geniş istifadəni strateji məqsədlərindən biri olaraq müəyyənləşdirib.

Qeyd edək ki, İnformasiya Kommunikasiya Texnologiyaları Agentliyi ölkədə informasiya-kommunikasiya texnologiyaları və rabitə (telekommunikasiya və poçt) sahələrində tənzimləmə və nəzarəti, eləcə də radiospektr idarəçiliyini həyata keçirir.