Poçt rabitəsi xidmətləri poçt göndərişlərinin qəbulu, çeşidlənməsi, saxlanılması, daşınması, göndərilməsi və ünvan sahibinə çatdırılması fəaliyyətidir. Bu xidmətlər ümumi istifadədə olan və xüsusi təyinatlı poçt rabitəsi növlərinə bölünür. Ümumi istifadədə olan poçt rabitəsi xidmətlərinə universal, sürətli və kuryer xidmətləri aiddir.

Poçt rabitəsi xidmətlərinin göstərilməsi proseslərinin tənzimlənməsi məqsədilə 2002-ci ildə  “Poçt rabitəsi xidmətlərinin göstərilməsi Qaydaları” təsdiq edilib. 2004-cü ildə qəbul olunan “Poçt haqqında” Azərbaycan Respublikasının Qanunu poçt rabitəsi sahəsinin inkişafını daha da sürətləndirib və milli poçt rabitəsi operatorunun şəbəkəsi vasitəsilə yeni xidmətlərin göstərilməsinə geniş imkanlar yaradıb. Qanun ölkədə poçt sahəsində fəaliyyətin hüquqi, iqtisadi, təşkilati əsaslarını müəyyənləşdirməklə bərabər, poçt rabitəsi xidmətləri göstərənlərlə istifadəçilər arasında münasibətləri tənzimləyir.

Universal poçt rabitəsi və poçt-maliyyə xidmətləri milli poçt operatoru olaraq təyin olunmuş “Azərpoçt” Məhdud Məsuliyyətli Cəmiyyəti tərəfindən göstərilir.

1997-ci il yanvar ayının 1-dən etibarən Azərbaycanda poçt rabitəsinin elektrik rabitəsindən ayrılaraq müstəqil qurum kimi fəaliyyətə başlaması ilə poçt rabitəsi özünün yeni inkişaf mərhələsinə qədəm qoyub. Milli operator 1999-cu ildən “Azərpoçt” Dövlət Müəssisəsi (DM) kimi, 31 avqust 2009-cu ildən isə “Azərpoçt” Məhdud Məsuliyyətli Cəmiyyəti (MMC) kimi fəaliyyətini davam etdirib.

 “Lisenziyalar və icazələr haqqında” Azərbaycan Respublikasının Qanununun 1 nömrəli əlavəsinin “Lisenziya tələb olunan fəaliyyət növlərinin (dövlət təhlükəsizliyindən irəli gələn hallar istisna olmaqla) siyahısı”nın 6-cı maddəsinə əsasən, “sürətli poçt xidməti” lisenziyalı fəaliyyətdir. Hazırda Azərbaycanda sürətli poçt xidməti göstərən 200-dən artıq poçt rabitəsi operatoru mövcuddur. Özəl poçt rabitəsi operatorları innovativ yanaşmaları və sürətli çatdırılma xidmətləri ilə sektora töhfə verir. Müştəri məmnuniyyətini artırmaq və xidmət keyfiyyətini yüksəltmək üçün müxtəlif texnoloji həllər tətbiq edir. Şirkətlərin bu sahədə artan rolu, poçt xidmətlərinin müasirləşməsinə və diversifikasiyasına imkan yaradır.